O Concello de Lugo pechou o trámite de consulta pública previa para a actualización da Ordenanza de Contaminación Acústica, cun total de sete achegas recibidas. O proceso permitiu recoller propostas de diferentes sectores da cidade, entre eles colectivos empresariais como a APEC e o CEL, asociacións veciñais, colexios profesionais e particulares.
Con este paso, o Goberno local segue avanzando na elaboración dunha norma adaptada á realidade actual de Lugo, que permita reforzar a protección da saúde e do descanso da veciñanza e, ao mesmo tempo, ofrecer seguridade xurídica ás actividades económicas e culturais. A ordenanza vixente na actualidade data de 1997.
As achegas recibidas abordan cuestións diversas, desde a protección do descanso veciñal e a regulación dos horarios até as condicións acústicas dos establecementos, o control das actividades e a aplicación de medidas correctoras.
Descanso, horarios e convivencia
Entre os asuntos formulados figura a necesidade de adaptar as medidas de protección acústica ás características de Lugo mediante estudos técnicos, mapas de ruído e unha delimitación adecuada das zonas acústicas, con especial atención aos espazos residenciais e ás áreas con maior concentración de actividades.
As propostas tamén se refiren aos horarios e aos niveis de ruído permitidos, especialmente durante a noite, así como ás obras, os traballos domésticos, as actividades comerciais e industriais e os eventos públicos. As celebracións ao ar libre e o funcionamento das terrazas son outros dos ámbitos nos que se apunta á necesidade de compatibilizar a actividade social e económica co dereito ao descanso.
A regulación da hostalaría e do ocio ocupa igualmente un lugar destacado, con consideracións sobre o illamento acústico, as condicións dos locais, os vestíbulos de acceso e as posibles limitacións das actividades. As achegas recollen diferentes perspectivas sobre como reforzar a protección acústica e, ao mesmo tempo, evitar restricións xeneralizadas que poidan dificultar a apertura ou continuidade dos negocios.
Control do ruído e seguridade xurídica
As propostas inclúen tamén cuestións relativas aos sistemas de medición, inspección e control, como os estudos acústicos, as comprobacións sonométricas, os limitadores e rexistradores de son e os sistemas de seguimento telemático.
Outras achegas céntranse no ruído procedente das instalacións de climatización e ventilación, as actividades deportivas e comerciais, os vehículos, a carga e descarga de mercadorías ou as instalacións industriais. Tamén se aborda a convivencia na vía pública e a delimitación das responsabilidades dos titulares das actividades e da Administración municipal.
Por último, as propostas prantean a importancia de establecer criterios claros para aplicar as medidas correctoras e o réxime sancionador, así como de valorar os períodos de adaptación, a viabilidade técnica e económica das actuacións necesarias e as posibles fórmulas de apoio aos sectores afectados.
O Concello continuará agora co trabalho de análise das achegas recibidas para avanzar na elaboración da nova ordenanza, co obxectivo de dotar a Lugo dunha regulación acústica actualizada, tecnicamente fundamentada e adaptada á realidade municipal.
Fonte: Concello de Lugo
