Cultura prevé obras na Sta. Mariña de Sarria antes do verán

A Consellería de Cultura, Lingua e Xuventude prevé ter rematadas antes do verán as obras de rehabilitación da igrexa de Santa Mariña, situada na Rúa Maior de Sarria e en pleno Camiño de Santiago.

Os traballos, que foron adxudicados por 546.647 euros á empresa Cabero Edificaciones, comezaron o pasado mes de novembro e, desde entón, o templo permanece pechado ao culto e ao público.

A principal obra do proxecto é a renovación da cuberta, que presentaba problemas de filtracións de auga ao interior. Estas incluso provocaron o pasado ano uns desprendementos no teito das dúas capelas laterais. A adxudicataria xa iniciou os traballos no tellado e execútaos na medida en que as condicións meteorolóxicas o permiten, segundo indicou a Administración autonómica.

A actuación supón a substitución do entablado de madeira e a colocación dunha lámina impermeable transpirable e dunha nova cuberta de lousa.

Nestes tres meses, os operarios tamén puideron desmontar o campanario, que xa se atopa nun taller para a súa restauración, segundo explicaron desde a consellería. Ademais, avanzaron na instalación do novo sistema de calefacción, que pasará a ser de gas e contará con conexión á rede xeral.

A adxudicataria tamén limpou a fachada e as torres, entre outros traballos, indicaron. Neste sentido, o proxecto contempla a limpeza da pedra, a eliminación de fungos e especies vexetais, a recuperación das xuntas entre os sillares e o pintado dos paramentos.

Entre as actuacións previstas inclúese a restauración do pequeno espazo no que se sitúa o baptisterio, eliminando a actual máquina de climatización e desprazando a pila bautismal. Esta, de orixe románica, será levada, unha vez restaurada, a unha posición máis centrada, «de modo que recupere a solemnidade propia do seu carácter», segundo o proxecto.

No interior tamén se contempla a recuperación de falsos teitos. Dentro destas obras actuarase, ademais, nas carpintarías exteriores e mellorarase a accesibilidade da igrexa. Para iso, construirase unha rampla na porta lateral, da que actualmente carece. Deste xeito facilitarase a entrada ás persoas con mobilidade reducida.

Para executar os traballos foi necesario instalar unha gran grúa e andamios, que cobren practicamente toda a igrexa. Ao prever que as obras estean rematadas antes do verán, o templo, que data de finais do século XIX, poderá recuperar a súa imaxe para a tempada alta de peregrinos.

A igrexa de Santa Mariña é unha das principais do Camiño de Santiago e é lugar de paso de milleiros de peregrinos. Cada ano inclúese no convenio que asina o Bispado de Lugo e a Xunta de Galicia para a apertura de templos situados nas principais rutas xacobeas.

Ademais, de luns a sábado acolle, ás 18.00 horas, a misa diaria dos peregrinos. Coas obras, este oficio tivo que ser trasladado á igrexa do convento da Merced e ten lugar ás 18.30 horas. Pola súa parte, a eucaristía dominical, das 12.00 horas, celébrase agora no templo de San Salvador. Estes cambios estarán vixentes ata a finalización e entrega dos traballos.