Está en marcha a 43ª Feira do Viño de Chantada, a primeira no calendario destas celebracións na Ribeira Sacra, que vivirá este domingo a súa xornada grande tras dous días con cheos de público, tanto o venres como o sábado.
Coa xente divertíndose na carpa da Praza de Galicia, o certame xa espera polas adegas gañadoras. Participan 13 este ano.
Cata oficial e primeiras impresións
Para iso tivo lugar a cata oficial. Celebrada no auditorio municipal e dirixida polo sumiller local Bruno Lovelle, o panel estivo composto por oito profesionais do sector, que foron degustando os caldos e decantándose polos seus preferidos.
As primeiras valoracións apuntaron a uns tintos «moi redondos e cunha madurez que non é a habitual nas datas nas que nos atopamos». Así o apuntou Andrea Obenza, enóloga das denominacións de orixe Ribeira Sacra e Rías Baixas.
En troques, para a súa compañeira Loreto Blanco, docente de sumillería en servizos de restauración no centro integrado de Formación Profesional (Cifp) de Vilamarín (Ourense), estas variedades necesitan «un pouco máis de tempo», aínda que indicou que lles se nota «moita froita e moita frescura».
Os brancos resultáronlle interesantes pola súa «calidade homogénea, destacan un par deles».
O xurado profesional
O panel completárono Lucía Carballeira Lois, da Asociación Galega de Enoloxía; Juan Manuel Posada-Curros Buendía, da Asociación Galega de Enoloxía e profesional da adega de Rías Baixas Martín Códax; Jorge Vila, diplomado no Wine & Spirit Education Trust (WSET) e director da Galicia Wine Academy; Fani Rodríguez Alves, da Asociación Galega de Sumilleres e delegada comercial da adega Familia Torres; Pedro Villamarín González, vicepresidente da Asociación Galega de Sumilleres; e Gelín Fernández, membro do comité de cata do consello regulador da Ribeira Sacra.
Novedades e ambiente na feira
Unha das novidades este ano é que a cata popular sacouse da carpa para levala tamén ao auditorio. Na entrada a estas instalacións, un público máis selectivo desfrutou dun Túnel do Viño.
Foi o caso de Ana Fontán, chegada desde Barro (Pontevedra). «A cata está moi ben organizada. Dos brancos gustounos moito xa un dos primeiros que probamos, pero os mencías deste ano están aínda pouco feitos», destacou.
Moitos coincidiron en que o traslado da actuación da agrupación tradicional da Casa da Música do sábado ao venres explica o cheo da xornada inaugural, maior do habitual.
Programación musical e xornada final
Este sábado actuaron os gaiteiros Os Barrios, o grupo Searas, a banda de música de Chantada e as charangas Unión Phenosa e Louband.
A xornada final comezará co grupo Castro Candaz (11.30), a charanga NBA (12.00) e a banda de gaitas do Concello de Chantada (12.30). Ás 12.50 lerase un manifesto polo 8-M e ás 13.00 dará comezo o pregón do cómico Roberto Vilar. Ao rematar entregaranse os premios ás adegas.
Pola tarde, cara o remate da festa, haberá máis música de charanga na carpa, con NBA e Bandiños Band. Desde as 21.00 horas, a guinda poñerá a orquestra Saudade.
Únete a la conversación
Regístrate gratis con tu email para comentar en las noticias. Tu opinión importa.