A Deputación de Lugo puxo en funcionamento un Centro de Innovación Territorial (CIT) co obxectivo de aplicar solucións tecnolóxicas e industriais ao medio rural para xerar emprego e frear a perda de poboación na provincia.
O proxecto arranca cun equipo de cinco profesionais que se encargará de abrir e xestionar sedes físicas en Navia e Burela, que se sumarán á sede da Deputación. Haberá persoal permanente neses lugares e outro que se desprazará polos concellos.
O CIT nace como un espazo de cooperación público-privada para conectar administracións, empresas, universidades, centros de investigación e sociedade civil. O seu propósito fundamental é reactivar a economía local, facilitar o emprendemento, transferir innovación e fixar poboación no territorio.
O centro conta cunha coordinadora xeral e dous técnicos encargados de analizar necesidades, captar financiamento e dinamizar redes, apoiados por dous profesionais nas áreas de comunicación, atención de consultas e soporte administrativo.
Financiación para proxectos relacionados coa auga
Unha das liñas de traballo do CIT é a obtención de fondos europeos e estatais para financiar proxectos estratéxicos para o territorio que xeren emprego e activen a economía. Tamén buscará financiación para rehabilitar e dar uso a instalacións propiedade da Deputación, como o antigo hospital psiquiátrico de Castro Ribeiras de Lea, no concello de Castro de Rei.
Nunha recente visita ao centro de traballo do CIT no pazo de San Marcos, a presidenta da Deputación, Carmela López, trasladou ao equipo a necesidade de explorar vías de financiamento para proxectos relacionados coa captación e o suministro de auga, unha das demandas que máis recibe dos concellos ante o cambio climático.
Modernización do sector primario
Outra liña de traballo será apoiar a modernización do sector primario. Os técnicos traballarán a pé de campo como axentes de innovación para conectar as cooperativas con provedores tecnolóxicos e crear casos de éxito replicables. O plan de traballo contempla accións concretas, como algunhas das deseñadas para o Pazo de Tor (Monforte de Lemos), aínda que será máis adiante, cando os técnicos estuden con máis detalle as necesidades do territorio e a viabilidade das iniciativas, cando se decidirá cales se priorizarán.
Outro eixe de acción será a xeración de emprego e a retención de profesionais. Prevése a creación dunha plataforma dixital para conectar profesionais, tanto locais como emigrados que queiran regresar ao territorio, coas empresas da provincia. O proxecto inclúe eventos de traballo en rede (networking) para visibilizar ofertas de emprego cualificado e facilidades para o tel.
Claves
- O centro conta cun equipo de cinco profesionais.
- O proxecto inclúe un plan de traballo ata 2029.
- Sedes físicas en Navia e Burela, ademais da sede da Deputación.
- O CIT lucense é promotor dunha axenda compartida de CITs de doce provincias con importante superficie de territorio rural.
Fonte: Deputación de Lugo
