A Xunta e o Concello de Malpica de Bergantiños asinaron un convenio de colaboración mediante o cal destinarán 1,25 millóns de euros á construción dunha estación depuradora de augas residuais (EDAR) e dunha rede de colectores de saneamento no lugar de Beo. O acordo foi rubricado pola conselleira de Medio Ambiente e Cambio Climático, Ánxeles Vázquez, e o alcalde de Malpica de Bergantiños, Eduardo Parga.
Segundo a conselleira, a actuación permitirá garantir un servizo de calidade á veciñanza, mellorar a xestión das augas residuais e a protección do medio natural, ademais de garantir un bo estado ecolóxico das augas e dos seus sistemas asociados, xa que se eliminarán os vertidos de augas sen tratar.
A actuación, de carácter integral, permitirá renovar e completar as principais infraestruturas hidráulicas deste contorno. Ademais da construción da EDAR, dimensionada para máis de 250 habitantes equivalentes, executaranse preto de 1,8 quilómetros de nova rede de saneamento, renovaranse preto de 540 metros da rede de pluviais e tamén se renovará a rede de subministración de auga.
O proxecto será financiado nun 80% pola Xunta e nun 20% polo concello.
Incluída nunha carteira de 11 proxectos
A actuación forma parte da carteira de 11 proxectos que impulsa a Consellería de Medio Ambiente e Cambio Climático a través de Augas de Galicia, ao amparo do Plan Estratéxico da PAC 2023-2027, cun investimento global de máis de 7,5 millóns de euros destinada a reforzar os servizos básicos da auga no rural e a mellorar as infraestruturas hidráulicas municipais.
Ánxeles Vázquez lembrou, así mesmo, que a Xunta mantén unha política activa de colaboración cos concellos, achegando financiamento e apoio técnico para acometer actuacións que, pola súa complexidade ou polo seu custo económico, resultarían difíciles de executar exclusivamente con recursos municipais.
Fonte: Augas de Galicia
