Nuno Pico, líder de Grande Amore, estrea un novo proxecto musical da man dos seus vellos compañeiros en Oh! Ayatollah: os ourensáns Anaís Fernández e Andrés Real; o burelao Xoel Xeada; e o lucense Simón Cuba. A súa nova aventura leva por nome Portosanto.
Un novo rumbo: Portosanto
Os membros son os mesmos pero o enfoque e o nome do grupo dan un xiro. No seu perfil de Instagram explican de onde vén a idea de Portosanto.
Fano a través dunha historia fantástica sobre o naufraxio do Santa Carballido, un barco que saíu do Porto de Vigo cara América «á busca dunha vida mellor», ata que unha tormenta afundiu o navío.
Dícen que os superviventes lograron chegar a terra firme na illa de Portosanto, unha das que forman o arquipélago da Madeira. Os detalles desta aventura foron recollidos polo capitán André de Andrade no seu diario.
Anos máis tarde, naquela mesma illa, só quedaban vestixios desa sociedade, pero, ademais do diario, atopouse unha bandeira que ondulaba no alto de Pena Xeada coa frase «ten que haber un sitio para nós».
Unha publicación compartida de Ernie Records (@ernierecords)
Primeiro single e álbum homónimo
Con esta trepidante historia presentaron este xoves o seu primeiro single e adianto do seu futuro álbum homónimo Ten que haber un sitio para nós. Este disco gravárono da man do selo Ernie Records, que deron a benvida á nova banda galega nas súas redes sociais.
Orixes en Oh! Ayatollah e traxectoria
Oh! Ayatollah naceu en Santiago de Compostela. Formárono os mesmos integrantes xa mencionados, todos eles eran estudantes das facultades de Filoloxía e Xeografía, que se reuniron coa idea de crear un grupo de pop galego.
Lanzaron en abril de 2016 o seu primeiro EP Nihilismo entusiasta e dous anos máis tarde o seu primeiro e único álbum Volve a canción protesta.
Despois destes lanzamentos pasaron por múltiples escenarios e deron a coñecer no panorama musical galego. En 2019 o grupo entrou nun período de inactividade que coincide co inicio do proxecto en solitario do seu cantante Nuno Pico, quen comezou a sacar cancións baixo o pseudónimo de Grande Amore.
Cos anos, foise convertendo nun éxito de vendas e, a día de hoxe, é un referente musical en Galicia.
Un futuro paralelo para Nuno Pico
Para o alivio dos seus fans, Nuno Pico continuará co seu exitoso proxecto pero súmase á interesante e renovada proposta da banda galega.
O artista con orixes no Valadouro confirmou, nunha entrevista para o medio Nós Diario, que estará a traballar en paralelo con Portosanto á vez que se mantén con Grande Amore.
Únete a la conversación
Regístrate gratis con tu email para comentar en las noticias. Tu opinión importa.