1-0. Derrota previsible para o FSF Castro, pero inxusta

O FSF Castro caeu ante o Melilla por 1-0 nun encontro no que, aínda que o resultado era previsible, o Castro mereceu máis. As de Julio Delgado completaron unha segunda parte na que estiveron moi preto de igualar o choque, pero o solitario tanto de Emily Marcondes foi suficiente para que os tres puntos quedasen no pavillón Javier Imbroda.

O FSF Castro tivo que aguantar diante do mellor equipo da competición, xa que o Melilla puxo toda a carne no asador desde o inicio. Amandinha e Emily Marcondes comezaron a dominar a pista co seu xogo ofensivo, polo que ás de Julio Delgado non lles quedou outra que encomendarse ao traballo defensivo.

Ben é certo que o conxunto chairego logrou ter dúas oportunidades moi claras nos últimos dez minutos da primeira parte. Natalinha gozou dun man a man no minuto 12 que non tivo éxito e Luisa Mayara tivo un disparo no 16 que se foi lixeiramente desviado.

No acoso e derrubo constante do Melilla, a máis clara chegaría no último minuto do primeiro tempo. Ana Luiza estivo cerca de bater a Caridad cun potente disparo que golpeou na cruceta. O guión cumpríase á perfección, pero o cerroxo permanecía na portería do Castro cando chegou o descanso.

No arranque da segunda parte, Ana Luiza atopou a Emily Marcondes, que logrou romper o cadeado do Castro e abrir o marcador. Todo podía supoñer que o Melilla iría a por o segundo, pero foi o Castro quen colleu o control do encontro.

As ocasións sucedéronse no tramo seguinte. Antía Pérez topouse con María Arcas no minuto 27, mentres que Luana e María Clara amedrentaron con bos disparos a falta de dez minutos que se foron lixeiramente desviados.

O empeño non cesaba e, a falta de cinco minutos, tanto Jenni Santos como Antía Pérez mandaron os seus disparos altos. A tendencia marcaba que o conxunto chairego merecía levar algo da visita máis dura da tempada.

Julio Delgado apostou con todo polo encontro, utilizando á porteira-xogadora para ir a por o empate. A superioridade deu ocasións con un bo disparo de Natalinha que quedou moi preto de bater a María Arcos. Pero a máis clara foi a dous minutos do final. Unha xogada moi ben xerada polo Castro acabou nun centro ao que non chegou Patri Ortega para empatar. Aínda que a derrota puidese ser lóxica, polo seu desenvolvemento foi inxusta.