Concello de Cervantes e BNG acordan pola Atención Primaria

Ao redor de medio cento de persoas concentráronse este xoves ante o centro de saúde de San Román de Cervantes para esixir a cobertura das prazas de medicina e enfermaría destas instalacións e do consultorio de Doiras.

Esta protesta engádese ás convocadas nas semanas pasadas polo BNG e á que, nesta ocasión, se sumou o Concello.

Reivindicacións pola Atención Primaria

Segundo explica o tenente de alcalde, Miguel González, a decisión de aliarse co Bloque para reivindicar unha Atención Primaria «en condicións» para o municipio débese á «ausencia de novas e de avances por parte do Sergas» despois da reunión co xerente da área sanitaria de Lugo, Ramón Ares, hai case un mes.

«Pasou o prazo que lles demos e non se moveron», engade González, que indica que desde o goberno local tamén se rexistrou unha queixa e enviáronse escritos á Consellería de Sanidade, á área sanitaria de Lugo, A Mariña e Monforte e ao ministerio para que «nos dean explicacións sobre que está a pasar, por que non se cobren as prazas e, o máis importante, por que non se sacan a concurso».

Situación da praza de Doiras

Miguel González indica, neste senso, que a praza de médico de Doiras —esta semana estivo sen actividade, aínda que o Concello non recibiu ningunha comunicación oficial sobre o seu peche— «leva sen cubrir un ano e medio porque nin sequera se oferta».

Por iso piden que se oferten as prazas vacantes «o tempo que sexa necesario» ata cubrilas, que se restableza o servizo e que, no caso de que a Xunta decida pechar o consultorio de Doiras, «polo menos que nolo digan, pero que non anden ás escondidas».

Postura dos partidos e do Sergas

O BNG coincide nas peticións e acusa ademais ao PP de «aplicar unha política consciente de deterioración da sanidade pública no rural: primeiro recortan, despois precarizan e finalmente pechan servizos», o que se agrava en Cervantes, en plena Montaña lucense e cunha poboación envellecida.

Por outra banda, o Sergas insiste na falta de profesionais nas listas como motivo que impide cubrir de forma estable as prazas, aínda que González aboga por unhas «condicións dignas» na contratación de persoal sanitario.