O pleno do Concello de Ferrol aprobou a Conta Xeral do exercicio de 2025, que reflicte unha evolución positiva da situación económica e patrimonial municipal, cun incremento de 7 millóns de euros no patrimonio neto respecto do exercicio anterior. A aprobación produciuse cos votos a favor do Goberno e en contra dos grupos municipais do PSOE, BNG e FeC.
A concelleira de Facenda, Susana Sanjurjo, explicou que a Conta Xeral é o documento que recolle «o reflexo fiel de todas as operacións e de todas as actuacións levadas a cabo durante un exercicio económico, neste caso, o correspondente a 2025».
Segundo os datos da Conta Xeral, o total do activo e do pasivo ascendeu a 191 millóns de euros, fronte aos 183 millóns do exercicio 2024. O saldo neto da conta do resultado económico-patrimonial representa un aforro de 7 millóns de euros. O patrimonio neto do Concello sitúase en 161.105.700,19 euros.
«Estes datos amosan a evolución positiva das contas municipais nun contexto no que estamos incrementando o gasto e mantendo os impostos sen subidas», subliñou Sanjurjo, quen destacou tamén que durante 2025 o 92 % dos procedementos de contratación de contratos maiores realizáronse mediante procedemento aberto. A edil lembrou que ao inicio do actual mandato se atoparon «numerosos servizos sen contrato», situación que, segundo explicou, «foi regularizada durante estes anos».
A Conta Xeral recolle así mesmo unha redución significativa no importe dos reparos: 11 millóns de euros durante 2025, fronte aos 32 millóns rexistrados no período de referencia do anterior goberno municipal, o que supón unha redución do 66 %, segundo destacou a concelleira.
Execución orzamentaria
Sanjurjo tamén deu conta da execución orzamentaria do segundo trimestre de 2026. No primeiro semestre executáronse 39 millóns de euros, 26 millóns máis que no primeiro trimestre. O capítulo 6, correspondente ás inversións, acadou os 4 millóns de euros no primeiro semestre, un 900 % máis que no primeiro trimestre.
A edil destacou a evolución acumulada da execución ao longo do mandato: «Durante os catro anos do mandato anterior a execución foi de 233 millóns de euros, mentres que en tan só tres anos este goberno leva xa 277 millóns de euros executados, e aínda queda un ano de mandato». En inversións, precisou que nos catro anos do mandato anterior executáronse 17 millóns de euros no capítulo 6, mentres que o actual Goberno local xa supera os 32 millóns en só tres anos.
Outros puntos do pleno
O Pleno aprobou as duas festividades locais do municipio para o ano 2027: o 7 de xaneiro, festividade de San Xiao, e o 29 de marzo, Luns de Pascua, festividade de Chamorro.
Finalmente, aprobou unha declaración institucional de condena polos actos vandálicos cometidos recentemente contra a sede da Cruz Vermella na cidade. A Corporación municipal trasladou a súa solidariedade e apoio á Cruz Vermella, ao seu persoal e ao voluntariado, e recoñeceu o seu compromiso permanente coa sociedade ferrolá.
Fonte: Concello de Ferrol
