FSF Castro Cando empatou este domingo ante o poderoso STV Roldán FSF —é o segundo clasificado da Liga— grazas a un golazo de Dani Sousa, tras unha espectacular asistencia de Natalinha, a falta de 8 segundos para o final, nun duelo que tivo dúas caras ben diferentes.
A primeira parte foi do conxunto murciano, máis intenso e atinada; e a segunda, das chairegas, que someteron ao seu rival a un acoso continuo, sobre todo a partir de que Julio Delgado optase pola porteira-xogadora.
Dominio inicial do Roldán
O choque arrancou cun Roldán mandón, presionando as liñas de pase do cadro chairego e xerando perigo.
Corría o minuto 11 cando Teresa, cun disparo cruzado, aproveitou unha xogada pola banda esquerda para poñer o 0-1 no marcador.
Reacción do Castro e vantaxe visitante
As de Julio Delgado espertaron, pero novamente o conxunto de Torre-Pacheco foi o que acertou coa portería rival.
Teresa foi outra vez quen martelou a Caridad ao definir moi ben un balón longo (minuto 19).
O Castro respondeu ao instante, primeiro cun disparo de Patricia Ortega (m.19) e posteriormente cun outro de Antía Pérez. O un e o outro marcharon fóra e, en consecuencia, o duelo chegou ao descanso con 0-2 para as visitantes.
Remontada e empate agónico
O panorama cambiou tras o paso polos vestiarios. O Castro puxo unha marcha máis en intensidade e logrou recortar a diferenza por medio de Antía Pérez (m.27).
O 1-2 espoleou aínda máis ao equipo chairego, que puido lograr o empate en dúas claras ocasións de Natalinha, a segunda delas a porta baleira (m.23 e 24).
O técnico local queimou as naves a falta de 5 minutos para a conclusión ao pór como porteira-xogadora a Luisa Mayara ante un Roldán metido moi atrás.
Dani Sousa e de novo Natalinha, en dúas ocasións, dispuxeron de opcións para poñer o 2-2.
O reforzo brasileiro foi a gran protagonista dese final, pois unha gran asistencia súa de costas ao balón, a 8 segundos da conclusión, deixou unha ocasión de ouro a Dani Sousa, que non a desaproveitou e desatouse a algarabía no Municipal.
Únete a la conversación
Regístrate gratis con tu email para comentar en las noticias. Tu opinión importa.