A Xunta de Galicia abre desde mañá o prazo de solicitude para que os concellos costeiros interesados en asumir a explotación de servizos de tempada na zona do dominio público marítimo-terrestre (DPMT) dos seus municipios poidan tramitar a autorización correspondente. Así se recolle no anuncio publicado hoxe no Diario Oficial de Galicia (DOG) sobre os prazos relativos aos servizos, actividades e eventos que se poderán instalar no DPMT de cara á tempada alta do próximo ano.
Desde mañá e ata o 30 de outubro, as entidades locais poderán presentar, con carácter preferente, as súas solicitudes de prórroga ou de nova autorización a través do procedemento único habilitado na sede electrónica da Xunta, tomando como referencia a guía e o modelo base para a elaboración do plan de explotación de cada concello, que terá unha vixencia de catro anos. Este material está xa dispoñible no portal Galicia litoral da web da Consellería de Medio Ambiente e Cambio Climático, e está previsto convocar tamén un webinario informativo dirixido ás entidades locais.
Este é o segundo ano en que o Goberno galego asume a tramitación directa das solicitudes dos concellos interesados na explotación de instalacións, actividades, eventos e servizos de tempada e praia no DPMT do seu termo municipal, traspaso efectivo á Xunta o 1 de xullo de 2025 das funcións e servizos para a xestión do litoral. Este ano, un total de 18 municipios costeiros galegos asumiron a xestión desta zona. Nestes casos, serán as propias administracións locais as que tramitarán o procedemento para a adxudicación a terceiros dos servizos e actividades que se desenvolvan nesta franxa da costa, incluída a publicación dos correspondentes anuncios cos prazos para a presentación de ofertas ou solicitudes de participación.
Unha vez pechado este primeiro prazo, preferente e reservado só para concellos, as persoas físicas e xurídicas interesadas en explotar servizos de tempada en terreos do DPMT situados en municipios costeiros que non teñan asumida a súa xestión poderán solicitar autorización á Xunta desde o 16 de novembro ata o 31 de decembro deste ano.
O anuncio establece tamén que o prazo de apertura para os servizos e actividades de tempada estenderase desde o primeiro día da próxima Semana Santa, o 19 de marzo, ata o 31 de outubro de 2027. Durante este período, como xa se permitiu por primeira vez este ano, as instalacións autorizadas poderán permanecer abertas de forma ininterrompida. Ademais, tendo en conta o seu carácter temporal e desmontable, este tipo de construcións —por exemplo, os chamados chiringuitos de praia— deberán quedar efectivamente retiradas do DPMT nun prazo máximo de 15 días, contados desde a finalización da tempada.
Claves
- Prazo preferente para concellos costeiros: desde mañá ata o 30 de outubro, a través da sede electrónica da Xunta.
- Solicitudes de persoas físicas e xurídicas en municipios sen xestión asumida: do 16 de novembro ao 31 de decembro deste ano.
- Período de apertura de servizos e actividades de tempada: do 19 de marzo (inicio da Semana Santa) ao 31 de outubro de 2027, con funcionamento ininterrompido permitido.
- As construcións temporais e desmontables deberán retirarse do DPMT nun prazo máximo de 15 días desde a fin da tempada.
- A guía e o modelo base do plan de explotación están dispoñibles no portal Galicia litoral da web da Consellería de Medio Ambiente e Cambio Climático.
- Prevese convocar un webinario informativo dirixido ás entidades locais.
Fonte: Xunta de Galicia
