A Sarriana asinou un meritorio empate sen goles no estadio Adolfo Suárez ante o Real Ávila nun partido esixente no que o conxunto lucense soubo resistir as embestidas locais e tamén xerar perigo en momentos clave.
O equipo dirixido por Dani Giménez amosou carácter competitivo e orde defensiva para sufrir nun encontro con ocasións para ambos conxuntos.
O punto, no campo dun rival que loita por entrar no playoff, alimenta as opcións do cadro sarriano na súa loita pola permanencia.
Inicio intenso e primeiras ocasións
O partido comezou cun ritmo moi alto e moita actividade en ambas áreas, cos dous equipos buscando impor o seu xogo dende os primeiros compases.
O primeiro aviso foi do cadro abulense, cun cabezazo de Pascual que se marchou por enriba do largueiro. A Sarriana respondeu axiña cun rápido contragolpe pola banda esquerda que xerou certa inquietude na defensa local, aínda que faltou precisión para que Millán puidese culminar a internada.
O encontro entrou despois nunha fase máis igualada, cos dous equipos ben posicionados sobre o terreo de xogo e tratando de atopar espazos en campo rival.
Ocasións e contratempos antes do descanso
A ocasión máis clara do primeiro tempo para o conxunto de Dani Giménez orixinouse nas botas de Santi Gegunde, cuxo disparo estivo a piques de converterse nun auténtico golazo, pero Urbina apareceu sobre a liña de gol para evitar o 1-0 cando o balón xa se colaba na portería.
Tamén o intentou Millán nun un contra un co gardameta local, Óscar Pérez, tras unha asistencia de Arona dende a frontal da área, aínda que o seu remate marchou alto.
Os pupilos de Dani Giménez amosaron personalidade en ataque e demostraron que podían facer dano cando lograban enlazar as súas transicións.
O conxunto sarriano sufriu un contratempos importante no minuto 27 coa lesión de Arona, que tivo que abandonar o terreo de xogo e foi substituído por Boedo.
Ao fío do descanso chegou unha das accións máis claras do partido para o Real Ávila. No minuto 40, cando a grada do Adolfo Suárez xa cantaba o gol, tras unha boa xogada combinativa polo costado dereito entre Runy e Diego Lorenzo, o balón chegou a Sarr, que armou o disparo dende as inmediacións da área.
Porén, Berardozzi reaccionou con rapidez e sacou o balón, frustrando a ocasión máis perigosa do conxunto abulense ata ese momento.
Domino local e resistencia visitante
Tras o paso polos vestiarios o conxunto dirixido por Aitor Martínez deu un paso adiante e apertou con insistencia, tratando de pechar a Sarriana no seu propio campo.
Diego Lorenzo dispuxo dun man a man que resolveu ben Pirot, mentres que Carlos Pérez mostrouse moi activo en ataque e estrelou un potente disparo no largueiro no minuto 66 que levantou á grada e reflectiu o dominio local nese tramo do encontro.
Durante varios minutos a Sarriana tivo que resistir preto da súa área, acumulando esforzos defensivos e mantendo a concentración ante as continuas chegadas do rival.
Dani Giménez moveu o banco para refrescar ao equipo sen alterar o seu esquema habitual, mantendo o 4-4-2 e buscando soster o resultado mentres pasaban os minutos.
Treito final e reparto de puntos
No treito final o encontro abriuse de novo e o cansazo comezou a notarse en ambos equipos.
A escadra vermella seguiu buscando o gol con insistencia, pero a defensa do equipo lucense mostrouse firme e ben organizada.
Mesmo no tempo engadido, a Sarriana puido sorprender nunha acción dentro da área, aínda que a zaga local evitou o remate.
Únete a la conversación
Regístrate gratis con tu email para comentar en las noticias. Tu opinión importa.