CONTIDO:

Dous días de competición contrarreloxo nos que a creatividade, a habilidade e a rapidez serán elementos clave para facerse cun dobre premio: a satisfacción de gañar a Copa de España de Arte Floral que organiza a Asociación Española de Floristas este fin de semana en Valencia e acadar o billete directo para o Europeo.

É un reto difícil, pero de ilusión e ganas van sobradas Paqui Espiñeira, de Guitiriz, e Ana María Filer Petrea, de Soto del Real (Madrid), que enfronte terán outros oito equipos chegados desde distintos puntos de España con exactamente o mesmo obxectivo.

CONTENIDO PATROCINADO

Salado Golf & Beach Resort

Descubre la oportunidad de inversión más exclusiva del Caribe. Villas de lujo con retorno garantizado del 12% anual en Punta Cana.

Conoce más →

Traxectoria das floristas

Paqui, da tenda AgroAbelleira, iniciouse en 2018 no mundo da flor de casualidade, xa que unha traballadora do seu negocio tiña coñecementos. A partir de aí, foi encadeando cursos e experiencias (traballa para particulares, pero tamén para o Iberik Gran Balneario de Guitiriz ou o restaurante La Casilla) e en 2023, en Cantabria, coñeceu a Ana, quen chegou a España hai 20 anos desde Rumanía e hai dez abriu a súa propia floristería, Ana Madrid Flowers.

Desde entón foron coincidindo en máis formacións, fíxeron amizade e o seu bo entendemento á hora de traballar xuntas levounas a colaborar noutras ocasións (como un shooting dunha wedding planner no Castillo de Pedraza). Así que de cara a esta competición, Ana viu en Paqui a súa axudante ideal.

O desafío da Copa

«Hai que botarlle moito valor, é unha responsabilidade moi grande», di a guitiricense, a única galega na cita, sobre o desafío que supón superar os próximos días, nos que terán que enfrontar cinco probas conxuntamente.

Paqui axudará na primeira parte de cada unha delas, mentres que a parte final a asume Ana en solitario, ao igual que a sexta e última.

«Podes levar algunhas estruturas preparadas e ideas segundo a temática, pero o traballo faise todo alí», adianta Paqui. Este venres dispoñerán de oito horas para prepararse e o sábado a competición arrinca ás 11.00 horas.

As probas da competición

Cañas y barro é a primeira proba e a única que se realiza no exterior e con plantas, patrocinada pola firma galega Veraleza. Nela terán que realizar un traballo alegórico fusionando a obra de Blasco Ibáñez cunha homenaxe ás vítimas da Dana.

Xa no recinto deportivo La Pechina, deberán materializar unha composición de mesa para tres comensais na segunda proba, L’esmorsaret entre pa i borreguet, facendo unha metáfora dun almorzo típico valenciano.

A Ciudad de las Artes y la Ciencias centra o terceiro e último reto do primeiro día, creando unha obra de grandes dimensións que recree algunha das edificacións do complexo valenciano.

A reliquia do Santo Cáliz inspira a primeira proba do domingo, a creación dun ramo de noiva, mentres que o tradicional pano de seda das falleras valencianas é o punto de partida para a segunda e última en equipo, La ruta de la seda, na que deseñarán un ramo de man con flor preservada (en todas as demais emprégase fresca).

Por último, Ana enfrontarase soa á proba sorpresa Pamell d’imaginació.

Ilusión, nervios e aprendizaxe

«Hai moitos nervios, pero imos con toda a ilusión e as expectativas sempre son as mellores, aínda que hai xente cunha bagaxe importante e nivel internacional», valora Paqui, que destaca o bo ollo para a cor e a «paleta moi persoal» de Ana.

«Ten composicións vaporosas, con transparencia, moi vistosas; a min gústame moito como traballa, e eu son moi orgánica e traballo moito as estruturas», concreta.

«Ímolo pasar xenial», asegura sobre unha nova experiencia que é tanto un desafío como un aprendizaxe. E sobre todo, é un paso máis no mundo que a apaixona, o da arte floral: «É un xeito de manifestar sentimentos e de emocionar; engancha!».